Gitawag ni veteran litigator Atty. Lorna Kapunan nga “payback time” ang iyang pag-apil isip usa sa mga private prosecutors sa umaabot nga impeachment trial ni Vice President Sara Duterte.
Manguna si Kapunan sa napulo ka de-kalibreng private prosecutors gikan sa tulo ka dagkong law firms sa nasud sa impeachment trial ni Vice President Sara Duterte sa Senado.
Ang grupo ni Kapunan mi-volunteer sa pagserbisyo nga pro bono aron suportahan ug palig-onon ang House prosecution panel. Si Kapunan maoy manguna sa unang batch sa napulo ka pribadong abogado gikan sa Kapunan & Castillo Law Offices, PECABAR Law, ug SALiGAL Law nga boluntaryong motabang sa House prosecution panel.
Gipasiugda ni Atty. Amando Virgil Ligutan sa SALiGAL Law nga ang balaod kinahanglan ipatuman og patas sa tanan, bisan unsa pa ang kahimtang o pagkaila sa apelyido.
Gipangutana usab niya kung ngano nga ang usa ka ordinaryong tawo mahimong makulong og 11 ka tuig tungod sa P5,000, samtang ang usa ka bise presidente dili dayon matangtang sa pwesto bisan pa sa giingong bilyon-bilyong pondo nga giabusohan.
Miingon usab si Atty. Marforth Fua sa PECABAR Law nga sila magsilbing giya aron masiguro nga matuman ang husto nga proseso ubos sa Konstitusyon, ilabi na sa pagsuporta sa paghusay ug pag-update sa House prosecutors mahitungod sa kasamtangang mga patakaran sa korte.
Gilauman nga pormal nga mosulod ug mopakita ang unang batch sa mga pribadong abogado sa Senate impeachment court dungan sa pagsumite sa House prosecution panel sa ilang pre-trial brief sa Hunyo 15.
