GENSAN– Gihingusgan karon sa Traffic Enforcement Unit (TEU) ug sa tibuok puwersa sa kapulisan ang pagpahigayon og mga random checkpoints sa nagkadaiyang dapit sa dakbayan aron masiguro ang kahusay ug kalinaw.
Gipahayag ni P/LTCOL. Patrich Elma, labaw sa TEU-GENSAN nga dili lang limitado sa pagresponde sa mga disgrasya sa dalan ang ilang trabaho.
Sumala pa kaniya, kabahin sa ilang deployment plan ang pagpahigayon og “random checkpoints” uban ang City Mobile Force Company ug Mobile Patrol Units.
Tumong niini nga masita ang mga kolorum nga sakyanan ug kadtong walay saktong dokumento, apil usab ang Smuggling, Loose firearms o mga armas nga walay lisensya, ug drag racing activities nga sagad mahitabo sa mga dagkong dalan sa syudad.
Gikumpirma usab sa opisyal nga duna na silay gipasaka nga mga kaso batok sa mga indibidwal nga nalambigit sa ilegal nga lumba sa dalan aron mapugngan ang bisan unsang krimen o disgrasya nga mahitabo sa umaabot.
