Emosyonal nga gibutyag ni Rachel Gupta, ang kanhing Miss Grand International 2024, ang tinuod nga rason sa likod sa iyang pagbiya isip titleholder pinaagi sa halos usa ka oras nga video nga iyang gipagawas online pagkahuman sa pormal niyang pagbiya sa titulo niadtong Miyerkules.
Sa maong video, giusa-usa ni Rachel ang iyang kasinatian sa milabay nga pito ka bulan isip reigning queen sukad sa iyang pagkadaog niadtong Oktubre 25, 2024.
Sukad pa sa pagsugod sa iyang reign, wala niya nadawat ang tarong nga pagtratar nga gisaad sa organisasyon.
Imbes nga ipapuyo siya sa gi-promisang “penthouse,” gipapuyo siya sulod og kapin usa ka buwan sa gamay nga kwarto sa hotel, ug pagkahuman, gibalhin siya sa usa ka karaan ug dili maayo ang kondisyon nga balay nga usa ka oras ang gilay-on gikan sa city center, gikan sa MGI Hall sa Thailand og wala usab siya gihatagan og sakyanan.
Dugang pa, wala natuman ang saad nga maka-biyahe siya sa kapin 20 ka mga nasud, ug wala usab siya gihatagan og pagkaon ug mga nag-unang panginahanglan.
Kada mosuway siya og pakig-estorya sa organisasyon bahin sa iyang kalisud, gihulga hinuon siya nga kuhaan sa titulo ug i-blackmail.
Giakusahan usab ni Rachel ang mga organizer sa MGI nga mga “cold-hearted business people” nga ang tuyo lang mao ang pagpang-warta.
Matud pa niya, nakasinati siya og ‘body-shaming’, wala niya nadawat ang tibuok nga cash prize ug usa ra ka higayon siya gihatagan og monthly stipend og nakaluwas ra siya pinaagi sa suporta sa iyang ginikanan.
Giangkon usab ni Rachel nga ilang gipangbaligya ang mga “cheap products” sa TikTok nga mura sila og salesgirls, usa ka kahimtang nga wala niya damha sa pagkadaug niya sa usa ka international beauty title.
Giklaro ni Rachel ang isyu bahin sa alegasyon sa MGI nga nilikay siya sa scheduled trip sa Guatemala.
Gipasalig niya nga walay tinuyoang pagsupak, ug iyang gihimo ang video aron ipakita ang tinuod ug aron matabangan ang ubang kababayen-an nga nagsunod sa iyang mga tunob, aron dili sila masayop ug masayran nila ang tinuod.
Sa kataposan, miingon ang Indian beauty queen nga magpadayon siya sa pagtuo sa iyang kaugalingon, ug mapasalamaton siya sa publiko sa ilang suporta, gugma, ug pagsalig kaniya.
Sa iyang pagbalik sa korona, gipadayag ni Rachel nga walay nawala kaniya, hinuon, nakasinati siya og kagawasan sa unang higayon human sa pipila ka bulan.
Miingon usab siya nga sa karon, makaginhawa na siya pag-ayo ug nabalik na ang iyang normal nga kinabuhi, nga dako niyang gipasalamatan.
