Gipahimangnoan karon sa City Government of General Santos ang mga traysikol drayber nga likayan ang pagsobra sa paningil sa pamasahe ilabi na sa mga bisita ug turista nga anaa sa siyudad karong panahona sa Batang Pinoy 2025 National Games.
Sumala sa Public Safety Office nga aduna na’y klarong taripa o pamasahe nga gisunod sa tanang drayber sa Gensan, ug gidungagan nga ang sobra nga paningil mahimong silotan subay sa ordinansa sa siyudad.
Gipasabot ni Atty. Jong Gonales nga ang pagpanikas sa plete sa mga bisita makadaot sa dungog sa Gensan nga nailhan nga “Home of the Champions” ug usa ka maabi-abihon nga siyudad. Giawhag niya ang publiko nga motaho dayon sa mga otoridad kon adunay traysikel drayber nga manglimbong o magpatuyang sa paningil.
Gisiguro usab sa lokal nga kagamhanan nga magpahigayon og random inspection ug monitoring aron masiguro nga patas ug husto ang plete nga ginapaningil sa mga pasahero, lokal man o bisita.
Gipasalig sa City Hall nga padayon nilang ipatuman ang disiplina sa sektor sa transportasyon aron mapadayon ang maayong imahe sa General Santos City isip usa sa labing organisado ug limpyo nga urban centers sa Mindanao.
