GENERAL SANTOS CITY – Gipahimangnuan ni Atty Rogelio Garcia, inilang abogado sa SOCCSKSARGEN, ang mga empleyado sa gobyerno nga ginapadayag sa social media ang ilang pagkontra sa gobyerno.
Kini gumikan sa namatikdan daghan social media posts sa ubang mga opisyal ug empleyado sa gobyerno sa ilang pagsaway sa gobyerno hilabi na sa isyu sa mga investment scams.
Sa pakighinabi sa Bombo Radyo, gibutyag ni Atty Garcia nga dili gayud angayang dayag nga sawayon sa mga government officials ug employees ang gobyerno, hilabi na sa publiko sama sa social media tungod mamahimo silang pasakaan ug kasong administratibo ilawom sa article standards sa mga empleyado, ug usa usab ka pagsupak sa naamyendahan nga RA 3019 kon Anti-Graft and Corrupt Practices Act.
Mahimo man matud pang magpadayag ang nasampit sa ilang mga personal nga panglantaw, apan kinahanglan nga sa ubang forum ug dili sa social media.
Kahibaluan nga kamatikdan sa social media nga daghang mga public officials ug empleyado sa gobyerno ang mitulisok sa gobyerno partikular na sa nahimong desisyon ni Pangulong Rodrigo Duterte nga pagpasirado sa KAPA kon Kabus Padatuon.
Bag-uhay lamang usab gikumpirma ni Mayor Ronner Rivera nga mukabat sa 95% sa mge empleyado sa city hall ang apektado sa naasoy’ng pagpasirado sa maong investment scam.
