Nagtutok na karon ang National Capital Region Police Office (NCRPO) sa mga pampublikong lugar ug karsada sa Metro Manila nga gilauman nga mahimong sentro sa mga lihok protesta karong Lunes, Septiyembre 21, isip pagsaulog sa ika-54 nga anibersaryo sa deklarasyon sa Martial Law.
Lakip sa mga nag-unang lugar nga gidugang sa hugot nga pagmonitor mao ang mga bahin sa EDSA, Chino Roces Bridge (Mendiola), J.P. Laurel Street, Ayala Bridge, ingon man ang mga pampublikong lugar duol sa Technological Institute of the Philippines (TIP) Manila, San Sebastian Church, ug University of the East (UE).
Sa wala pa ang adlaw sa pagsaulog mismo, personal nga nanguna si NCRPO Officer-in-Charge Police Brigadier General Christopher Abrahano sa usa ka walkthrough ug ocular inspection sa mga dagkong karsada sa Metro Manila aron masusi ang seguridad ug posibleng mga ruta para sa mga demonstrador.
Sumala ni Gen. Abrahano, ang sayo nga pag-inspeksyon sa mga giila nga lugar nga adunay gipahigayon nga protesta importante aron masiguro ang hapsay nga dagan sa trapiko ug ang kinatibuk-ang kaluwasan sa publiko ug mga lungsuranon.
Gipahinumdoman usab sa heneral ang tanang gipadala nga mga pulis nga magpabiling alerto apan hugot nga respetuhon ang katungod sa mga lungsuranon sa malinawong panagtapok ug gawasnon nga pagpahayag sa ilang mga opinyon.
