Posibleng dili na ipresentar sa House prosecution panel ang mga ebidensya alang sa ‘bribery charge’ batok kang Vice President Sara Duterte kung mahutdan og panahon ang impeachment trial sa dili pa sugdan sa Senado ang deliberasyon sa 2027 national budget.
Sumala sa prosecution spokesperson nga si Atty. Benjamin Tolosa Jr., target sa prosecution nga mahuman ang presentasyon sa ilang mga ebidensya batok kang Duterte sa tunga-tunga sa Oktubre, sa dili pa igahin sa Senado ang dakong bahin sa ilang oras sa paghisgot sa gisugyot nga ₱7.2-trilyon nga national budget alang sa sunod tuig.
Matud ni Tolosa, usa sa ilang gikonsiderar ang nahibiling panahon alang sa pagtaral sa pagdesisyon kung ipadayon pa ba ang presentasyon sa mga ebidensya kalabot sa ‘bribery allegation’.
Una nang gipahayag sa prosecution nga gitun-an niini kung ipresentar ba o i-dismiss sa ilang presentasyon ang impeachment article nga nag-akusar kang Duterte og pagpangwarta sa mga opisyal sa Department of Education aron matod pa malikayan ang procurement rules niadtong siya pa ang kalihim sa ahensya.
Gawas sa bribery, apil sa impeachment case ang mga alegasyon sa sayop nga paggamit sa gatusan ka milyon nga pisong confidential funds, unexplained wealth ug pagpanghulga kang Pangulong Ferdinand Marcos Jr., First Lady Liza Araneta-Marcos ug kanhi House Speaker Martin Romualdez.
Samtang, matud usab ni Tolosa nga gisusi sa prosecution kung gikinahanglan pa ba nga ipresentar ang tanang financial records nga may kalabotan sa unexplained wealth allegation tungod sa kadaghan sa mga dokumento nga kinahanglan ipakita sa impeachment court.
Hugot ang iskedyul sa Senado samtang gipahigayon ang impeachment trial ug giandam ang 2027 national budget.
Gilauman nga tibuok-adlaw ang pipila ka trial sessions sa unang bahin sa Oktubre sa dili pa ipunting sa Senado ang budget deliberations hangtod sa tunga-tunga sa Nobyembre.
Sumala sa kasamtangang iskedyul, mahimong ipadayon ang impeachment trial sa ulahing bahin sa Nobyembre.
