Gilauman sa House Prosecution panel nga motambong sa impeachment trial sa Lunes, Setyembre 28, si Davao City Mayor Sebastian “Baste” Duterte isip testigo batok sa iyang igsoon nga si Vice President Sara Duterte.
Sumala kang House lead prosecutor Rep. Gerville Luistro, andam ang prosecution nga ipresentar si Baste isip hostile witness ug gibanabanang usa ka oras o mas mubo pa ang ilang pagpangutana tungod kay cross-examination na lamang matod pa ang pangunang nahibilin.
Gimandoan sa Senate impeachment court si Baste nga motambong gikan Setyembre 28 hangtod 30 ug magdala sa mga rekord sa Davao City Government may kalabotan sa Gencorp Industries Inc. ug sa mga kompanyang nagpadagan sa mga branch sa Jollibee gikan 2020 hangtod karon.
Lakip ang Gencorp sa mga kompanyang gideklarar ni VP Sara isip business interest sa iyang 2024 ug 2025 Statements of Assets, Liabilities and Net Worth o SALN.
Sumala sa Davao City Government, adunay 19 ka kontrata ang siyudad sa Gencorp nga nagkantidad og P33.2 milyon.
Matod ni Baste, wala makita ang ngalan sa iyang igsoon o ang apelyido nga Duterte sa mga may kalabotang kontrata.
Apan sumala ni Luistro, wala pa’y kumpirmasyon gikan kang Baste kung motambong ba siya sa Lunes.
Matod niya, nagpabiling epektibo ang subpoena ug kabahin kini sa compulsory power sa impeachment court.
Kung dili siya motambong, mahimong mangayo ang prosecution og contempt, samtang mahimo usab nga magpagawas ang impeachment court og bag-ong subpoena o contempt order.
