GENSAN- Mas gipahugtan pa karon sa Police Regional Office (PRO) 12 ang ilang kampanya batok sa gidili nga droga aron masiguro nga dili kini makasulod ug makadaot sa mga komunidad sa rehiyon.
Gibutyag ni PBGEN Arnold Ardiente, Regional Director sa PRO-12, nga padayon ang ilang agresibong operasyon kauban ang Philippine Drug Enforcement Agency (PDEA).
Sumala pa kaniya, ang sunod-sunod nga pagpangdakop karong tuiga resulta sa mas gipakusgan nga monitoring sa mga Drug Enforcement Units.
Giangkon ni Ardiente nga ang dakbayan sa General Santos nagpabiling prayoridad tungod kay kini ang sentro sa komersyo, hinungdan nga dako ang posibilidad nga himuon kining “market” sa mga tugbaligyaog droga.
Bisan pa niini, giklaro sa opisyal nga wala silay na-monitor nga bisan unsang “drug laboratory” o “drug den” sa tibuok rehiyon. Kadaghanan sa ilang mga accomplishment naggikan sa pag-intercept sa mga supply nga gisuway og pasulod gikan sa ubang dapit.
Nagpahimangno si Ardiente, ilabi na ngadto sa mga kabatan-onan nga maoy daling mabiktima sa maong bisyo.
Giawhag usab niya ang publiko nga makigtambayayong sa kapulisan ug likayan ang bisan unsang tentasyon sa pagkalambigit sa droga aron mapabilin ang kahapsay ug kalinaw sa rehiyon.
