Gipasiguro sa Bangko Sentral ng Pilipinas o BSP nga padayon nilang pagabantayan ang epekto sa mga bag-uhay nga panghitabo sa Middle East ug mga kalamidad nga may kalabotan sa panahon, samtang ilang tutokan ang mga mogawas nga datos aron magiya sa direksyon sa presyo sa mga palaliton sa nasud.
Matud sa BSP, mikunhod ngadto sa 6.1 porsyento ang headline inflation niadtong Agosto, gikan sa 6.2 porsyento niadtong Hulyo, tungod sa mas ubos nga inflation sa pagkaon.
Bisan pa niini, misaka ngadto sa 5.2 porsyento ang average headline inflation sa unang walo ka bulan sa 2026, nga mas taas kumpara sa 3.0 porsyento nga tibuok-tuig nga target sa gobyerno.
Base sa monthly seasonally adjusted rate, misaka usab ngadto sa 0.5 porsyento ang inflation niadtong Agosto, gikan sa zero percent niadtong miaging bulan.
Mikunhod usab ang core inflation, o ang inflation nga wala maglakip sa mga presyo sa pagkaon ug enerhiya nga dali ra mausab, ngadto sa 4.1 porsyento gikan sa 4.2 porsyento niadtong Hulyo.
Samtang, nagpabiling stable sa 8.2 porsyento ang inflation alang sa mga pamilyang kabahin sa pinakagamay og kita o ang bottom 30 percent income households sa nasud.
Ang pagkunhod sa overall food inflation nalambigit sa mas lig-on nga suplay sa merkado, ilabina sa pagkunhod sa presyo sa mga utanon ug paghinay sa pagsaka sa presyo sa isda.
Apan misaka ang inflation sa bugas tungod sa mas taas nga gasto sa logistics o pagdala sa produkto ngadto sa merkado.
Nakatabang usab sa pagpugong sa pagsaka sa presyo ang pagkunhod sa singil sa kuryente ug tubig. Apan ang pagsaka sa presyo sa lana sa international market maoy hinungdan sa pagtaas sa pamasahe ug gasto sa transportasyon.
Ang 6.1 porsyento nga inflation rate niadtong Agosto naa sulod sa forecast range sa BSP nga 5.5 hangtod 6.5 porsyento alang sa maong bulan.
