Mahimong magdahom ang mga konsumedor nga adunay pagkunhod sa presyo sa imported nga bugas kung mapadayon ang gisugyot nga pagpakunhod sa taripa.
Sa usa ka panagtigom, gibutyag sa tigpamaba sa Department of Agriculture nga si Assistant Secretary Arnel De Mesa nga ang inisyal nga pagbana-bana nagpakita nga adunay P4 ngadto sa P5 matag kilo nga pagkunhod sa presyo sa imported nga bugas kon moepekto ang pagpakunhod sa taripa.
Sa karon, ang imported well-milled rice gibaligya sa tag P52 ngadto sa P54 matag kilo, sumala sa pinakaulahing price monitoring sa DA.
Kahibaloan nga giduso ni Finance Secretary Ralph Recto ang pagpaubos sa taripa sa imported nga bugas.
Sa pagkakaron, ang taripa sa imported nga bugas anaa sa 40% alang sa in-quota ug 50% alang sa out-quota. Kung maaprobahan ang sugyot, mag epekto kini lagmit sa bulan sa Septyembre.
