Gipirmahan na ni President Ferdinand Marcos Jr. ang balaodnon nga pormal nga nag-postpone sa Barangay ug Sangguniang Kabataan Elections (BSKE) ngadto sa tuig 2028.
Kini ang opisyal nga gikumpirma ni Palace Press Officer Undersecretary Claire Castro.
Subay sa bag-ong balaod nga giila isip Republic Act No. 12326, gilugwayan usab niini ang kasamtangang termino sa mga opisyal sa barangay ug SK ngadto sa lima ka tuig.
Sa usa ka opisyal nga pamahayag nga gipaabot pinaagi sa iyang social media post, gipasabot sa Presidente nga ang mas taas nga termino sa katungdanan nagpasabot og mas halapad ug dugang panahon sa epektibong pagserbisyo sa katawhan.
Pinaagi sa maong lakang, gihangyo ni Marcos ang mga kasamtangang opisyal nga gamiton ang higayon aron hingpit nga mapalambo ang paghatag sa mga batakang serbisyo, mahuman ang mga programa, ug tutokan ang tinuod nga mga panginahanglan sa matag komunidad, pamilya, ug kabatan-onan.
Dugang pa sa Presidente, ang maong desisyon dili lamang simpleng pagdugang sa panahon sa katungdanan, kondili usa ka dakong tulubagon ug seryosong responsibilidad ngadto sa publiko.
