GENSAN – Gi-awhag sa Philippine Red Cross (PRC) General Santos ang tanan nga mamahimong blood donor nga magpakatinuod sa proseso sa screening ug validation sa dili pa sila kuhaan ug dugo.
Matud pa ni Jhonny Fuscablo, Quality Assurance Officer sa PRC-Gensan, dili basta-basta nga makakuha og dugo ang bisan kinsa tungod kay adunay hugot nga proseso sa pagpangayo ug impormasyon ug pag-ila sa kahimtang sa panglawas sa usa ka donor.
Gipatin-aw ni Fuscablo nga importante ang pagkamatinuod sa tubag sa donor atol sa screening kay kini ang basihanan aron masiguro nga limpyo, luwas, ug angay gamiton ang dugo alang sa mga pasyente nga nagkinahanglan niini. Kung adunay itago o bakakon nga impormasyon, posible kini makahatag og peligro sa kinabuhi sa makadawat sa dugo.
Dugang pa niya, ang screening procedure usa ka standard nga lakang aron malikayan ang pagpasulod sa mga sakit nga mahimong matakod pinaagi sa dugo sama sa hepatitis ug HIV. Gipasalig usab sa PRC-Gensan nga padayon ang ilang paningkamot sa pag-edukar sa katawhan kabahin sa importansya sa responsible blood donation.
Gihangyo usab sa PRC ang publiko nga magpabilin nga masaligon sa proseso ug tabangan ang buhatan pinaagi sa tinuod nga pagpakig-uban sa screening aron daghan pang kinabuhi ang maluwas pinaagi sa limpyo ug luwas nga dugo.
