Nakatala og hapit 50 ka insidente sa kapintasan sa mga eskwelahan ang Philippine National Police (PNP).
Sumala sa PNP, gikan Hunyo 16 hangtod Agosto 19 ning tuiga, natala ang maong mga insidente nga nalambigit ang mga Children in Conflict with the Law (CICL).
Apil sa datos ang bag-ong insidente sa pagpamusil sa Ateneo de Zamboanga University, diin duha ka estudyante ang namatay.
Base sa datos sa Public Information Office sa PNP, adunay 26 ka giingong bomb threat, 12 ka pagpanghulga sa pagpamusil, upat ka insidente sa pagpanunggab, upat ka pagdakop sa mga indibidwal nga nagdala og ilegal nga armas, duha ka pagpanghulga sa kinabuhi, ug duha ka insidente sa pagpamusil.
Una nang gipahayag sa PNP nga gisugdan nila ang pagrekord ug pagmonitor sa maong mga insidente sa pagsugod sa bag-ong school year 2026–2027.
