Usa ka plumbing company sa siyudad sa Stavropol, Russia ang nakapukaw sa atensyon sa publiko human kini nagpatigayon og usa ka talagsaon nga patimpalak nga gitawag og “Game of Thrones.”
Sa maong kompetisyon, gipainom ang mga partisipante og non-alcoholic sparkling drink gikan sa bag-ong inidoro gamit ang dagkong straw. Ang unang makahurot sa ilimnon maoy modaog sa unang hugna sa contest
Gipahigayon ang kompetisyon sulod sa usa ka tindahan diin dose-dosenang mga partisipante ang mitambong alang sa higayon nga makadaog og 100,000 rubles, o kapin ₱79,000.
Ang mga partisipante gibahin ngadto sa mga grupo nga adunay pito ka miyembro, diin ang labing paspas nga makahurot sa ilimnon maoy makaabante sa sunod nga hugna.
Sa ikaduhang hugna, ang pito ka mga nakadaog kinahanglang molingkod sa usa ka siradong inidoro sa pinakataas nga panahon nga ilang kaya. Ang katapusang magpabiling naglingkod maoy gideklarang kampyon sa maong talagsaong kompetisyon.
Mikaylap dayon sa social media ang maong kalihokan, apan nakadawat usab kini og daghang kritisismo gikan sa publiko. Daghan ang miingon nga ang patimpalak makapaubos sa dignidad sa tawo ug dili angay himuong kalingawan.
