Mapasigarbuhon ang Presidential Anti-Organized Crime Commission (PAOCC) nga ang ubang kanasuran naghangad sa Pilipinas alang sa malampusong pagpalagpot ug pagsira sa Philippine Offshore Gaming Operators (POGOs) sa nasud.
Matod ni PAOCC Executive Director Gilbert Cruz, ang mga representante gikan sa US ug pipila ka grupo gikan sa Europe nakigtagbo kanila aron mangayo og tips kon giunsa sa gobyerno pagpahunong ang operasyon sa POGO sa nasud.
Gisulti ni Cruz sa Bagong Pilipinas public briefing nga ang ubang mga nasud nakadayeg sa mga lakang nga gihimo sa gobyerno nga miresulta sa pagsira sa mga operasyon sa POGO.
Bisan ang mga silingang nasud sa Asya, matod niya, sama sa Thailand, Cambodia, China ug Taiwan, nakadayeg sa tubag sa gobyerno sa problema sa POGO.
Nahimong problema usab sa mga silingang nasud ang mga POGO tungod kay namalhin sila sa ilang mga nasud human sila gipapahawa sa Pilipinas.
Kahinumdoman nga si Presidente Ferdinand Marcos Jr. niisyu sa Executive Order No. 74 nga nagpahamtang og total ban sa mga POGO sa nasud.
