Gipasabot ni Presidente Donald Trump sa Estados Unidos nga hapit na nila makab-ot ang ilang mga tumong batok sa rehimeng Iranian, busa gikonsiderar nila ang paghunong sa dakong operasyon militar sa Middle East.
Sa iyang pamahayag, gipasiugda ni Trump nga ang ilang mga lakang batok sa iyang giisip nga “terrorist regime” malampuson ug panahon na aron hunahunaon ang hinay-hinay nga pag-atras sa mga pwersa sa Amerika gikan sa rehiyon.
Ang nagkasumpaki nga mga aksyon sa White House ug sa Pentagon nakahatag og kalibog human si Presidente Donald Trump sa Estados Unidos nag-post sa Truth Social niadtong Marso 20 nga ang Amerika “nakadaog” ug gikonsiderar ang usa ka “hinay-hinay nga pagkunhod” sa mga operasyon sa militar sa Middle East.
Apan bisan pa sa pahibalo sa pag-atras, gikumpirma sa mga report nga ang Pentagon nagpadala og dugang nga 2,500 ka Marines ug amphibious assault ships sa rehiyon.
Sumala sa mga analista, ang pag-deploy sa amphibious assault ships usa ka indikasyon sa mga pagpangandam alang sa ground assault o island-landing operations, labi na sa Kharg Island, nga hinungdanon sa pag-eksport sa lana sa Iran.
Imbis nga mokalma, misamot ang tensyon kay wala giila sa Iran ang deklarasyon sa kadaugan ni Trump ug naglunsad og mga missile strike sa Diego Garcia ug mga siyudad sa Israel isip panimalos.
Bisan tuod giinsistir ni Trump nga ang mga pasilidad sa Kharg Island “hingpit nga naguba” human sa tulo ka semana nga pagpamomba, ang mga kapabilidad sa missile sa Iran nagpabilin nga aktibo.
Kini nagpugos sa Pentagon sa pagdugang sa pwersa niini, usa ka lakang nga nakita sa kadaghanan nga nagdugang og sugnod sa kalayo imbes nga tapuson ang gubat.
