Na-repatriate na sa gobyerno ang 106 Pilipino gikan sa Israel sa taliwala sa nagpadayon nga tensyon sa rehiyon, sumala ni Philippine Ambassador to Israel Aileen Mendiola.
Niini nga gidaghanon, 77 ang gidala sa Egypt, 28 sa Jordan, ug usa ang gibalik dayon pinaagi sa humanitarian flight. Lakip sa mga gipapauli mao ang usa ka duha ka bulan nga bata.
Sumala ni Mendiola, kadaghanan sa 26,675 ka mga Pilipino sa Israel nagpabilin tungod sa trabaho ug seguridad. Giklaro usab niya nga walay diskriminasyon sa paggamit sa mga bomb shelter sumala sa balaod sa Israel.
Gitambagan sa embahada ang mga Pilipino nga i-download ang “Home Front Command” app ug andama ang “Go Bags” nga adunay mga importanteng dokumento, pagkaon, ug tambal. Gitambagan usab sila nga moadto dayon sa mga shelter kung adunay alarma.
Nagpasidaan usab ang embahada batok sa pagkaylap sa peke nga balita ug mga imahe gikan sa AI, ug giawhag ang mga pamilya nga makigkomunikar lamang sa ilang mga minahal ug sa mga opisyal nga channel sa embahada.
