GENERAL SANTOS CITY – Gibahaan ang pipila ka bahin sa General Santos City human ang pagbundak sa ulan gumikan sa maut nga panahon sa bahin sa Mindanao.
Sa paglibot sa Bombo Radyo GenSan patrol, naabtan nga gilunopan og tubig baha ang kalsada atubang sa GenSan Sped Integrated School sa Barangay San Isidro.
Tungod niini, nastranded ang mga estudyante og naabtan pa og gabie sa lugar tungod nalisdan sa pagsakay.
Apan nakauli ang mga nasampit sa ilang mga balay human nga naghatag og libreng sakay ang Barangay San Isidro gamit ang ilang rescue van.
Sa Brgy San Isidro gihapon, usa ka van ang napalungan sa dalan tungod gihapon sa baha.
Pipila ka motorsiklo og tricycle usab ang napalongan ug natumba sa dalan nga nagresulta og grabeng traffic.
Ang uban pang lugar nga gibahaan mao ang mga Barangay sa Apopong , Lagao, Baluan og Mabuhay kung asa sa pipila ka area lagpas-tuhod ang tubig-baha.
Sa karon, mihupa na agng baha sa pipila ka lugar apan padayon gihapong nakaalerto ang mga residente.
Nasayran nga kapin oras nga mibundak ang ulan sa syudad kagabie.
