Subli nga makit-an sa undercard bouts sa engkwentro ni Manny Pacquiao si Mark “Magnifico” Magsayo, nga makaatbang mao si Mexican Jorge Mata Cuellar nga matigayon ang dula sa MGM Grand, Las Vegas, Nevada karong Hulyo 19.
Mag-atbang si Magsayo ug Cuellar sa usa ka 10-round match alang sa bakanteng World Boxing Council (WBC) Continental Americas Super Featherweight title.
Kahinumduman nga nakakuha og 10th round knockout si Magsayo batok kang Julio Ceja sa Pacquiao-Ugas fight kaniadtong 2021.
Siya ang nahimong WBC featherweight champion sa 2022 human iyang gipildi si Gary Russell Jr.
Gipasalamatan ni Magsayo si Pacquiao gumikan sa kahigayonan nga gihatag kaniya.
Sa pagkakaron, si Magsayo adunay rekord nga 27-2 uban ang 18 knockouts, samtang si Cuellar adunay 21-2-2 nga rekord nga may 13 knockouts.
Gawas kang Magsayo, apil usab sa fight card si Eumir Marcial, nga makaatbang si Alexis Gaytan sa usa ka eight-round middleweight non-title bout.
