Usa ka theme park sa Colombia ang naghimo og pinakadakong alkansyang baboy (piggy bank) sa tibuok kalibutan isip pagpasidungog sa lokal nga tradisyon sa paghimo og mga palayok o pottery.
Ang higanteng ceramic piggy bank nga nahimutang sa Mano del Artesano – Pueblito de Barro sa lungsod sa Ráquira, Colombia adunay gitas-on nga 29 ka piye ug 6.3 pulgada, gitas-on sa lawas nga 33 ka piye ug 11.8 pulgada, ug gibug-aton nga mokabat sa 30 tonelada.
Dili lamang kini usa ka ordinaryong rebulto tungod kay adunay kini tinuod nga buho para sa sensilyo diin mahimong maghulog og kwarta ang mga bisita sa theme park. Ang mga makolektang sensilyo igahatag ngadto sa mga lokal nga animal shelter sa maong lugar.
Mahimo usab nga sudlon sa mga bisita ang sulod sa maong higanteng alkansya diin makita ang usa ka gallery nga nagpakita sa kasaysayan sa paghimo og mga ceramic nga alkansya sa rehiyon.
Aduna usab kini lookout point sa ilong sa baboy diin makita sa mga bisita ang nindot nga talan-awon sa gawas, ilabina ang kabukiran sa Boyacá.
Gigamit ni Guinness World Records adjudicator Natalia Ramirez ang satellite technology aron masukod ang eksaktong gidak-on sa maong istruktura ug opisyal nga mailhan kini isip World’s Largest Piggy Bank.
Matud ni Ramirez, usa ka dakong pribilehiyo ang pagsusi sa usa ka istruktura nga sama kadako niini. Siya mismo misaka sa kinatumyan sa higanteng alkansya aron himuon ang opisyal nga coin-drop test, diin iyang nasaksihan ang matahum nga panoramic view sa kabukiran sa Boyacá
