Gimonitor sa mga awtoridad sa Pilipinas ug Indonesia ang pagsulod sa Indonesia ni kanhi Bamban, Tarlac Mayor Alice Guo ug sa iyang mga kauban sukad niadtong miaging semana.
Kini human ang surveillance nagpakita nga si Guo, iyang duha ka igsuon, ug ang representante sa Lucky South 99 nga si Cassandra Li Ong niabot sa Kuala Lumpur, Malaysia niadtong Hulyo 18.
Sa laing hulagway nga kuha niadtong Hulyo 21, makita ang gitaktak nga mayor nga nagbitbit og pink nga bag uban sa laing babaye sa airport sa Malaysia.
Gikan sa Malaysia, miadto sila sa Singapore ug nagpabilin didto sulod sa pipila ka adlaw sa wala pa mosakay ug lantsa mipaingon sa Batam, Indonesia. Base sa surveillance photos gikan sa Indonesia’s Immigration, sila si Ong ug Sheila Guo nasakpan nga nanaog sa usa ka sakyanan sa parking lot niadtong Agosto 20.
Alas 6 sa gabii sa samang adlaw, ang duha ka babaye gidakop sa mga awtoridad sa Indonesia.
Sumala pa sa taho si Ong ug Sheila gipaubos sa kustodiya sa mga otoridad sa Indonesia tungod sa “dili husto ug sayop nga representasyon.” Nasakmit usab ang usa ka Chinese passport gikan sa igsuon sa kanhi mayor sa Bamban, matod pa sa taho.
Ang mga awtoridad sa Indonesia, kauban ang mga ahente sa imigrasyon sa Pilipinas ug ang National Bureau of Immigration (NBI) nagpahigayon usab usa ka miting aron hisgutan ang padayong pagpangita kang Alice Guo ug ang iyang igsoon nga si Wesley.
Kahibaloan nga sila si Ong ug Shiela gihatud na balik sa Pilipinas kagahapong adlawa ug direktang gidala sa National Bureau of Investigation headquarters. makig-alayon ang NBI sa Senado ug Kamara labot sa mga arrest order nga ilang giluwatan.
