GENSAN- Gipahigayon karung adlawa, Marso 11, ang usa ka peaceful rally nga naghinumdom sa unang tuig sa pagkadakop kang kanhi Presidente Rodrigo Duterte.
Ang kalihokan gipangunahan sa Solidarity in Democratic Society Inc. ug gihimo sa Oval Gym sa General Santos City.
Sumala kang Kathyrine Alaba, chairperson sa grupo, ang pagtigom kabahin sa padayon nilang panawagan nga mapauwi si Duterte sa nasod ug pagpahayag sa suporta sa kanhing presidente.
Matud niini nga dili lamang sa General Santos gihimo ang maong panawagan kay adunay kaparehong kalihokan sa ubang bahin sa nasod sama sa Davao, Cebu ug Manila.
Gipahibalo usab ni Alaba nga plano sa grupo ang pagpadayon sa mga kalihokan matag bulan lakip ang prayer rally ug misa alang sa kanhing presidente.
Gilauman usab nga magpahigayon sila og simple nga panagtapok sa Marso 28 isip paghinumdom sa adlawng natawhan ni Duterte.
