Nanawagan si President Ferdinand Marcos Jr. sa pakigbatok sa fake news, sayop nga impormasyon ug walay kataposang bakak tungod mao kini ang tinuod nga hampak sa atong kagawasan.
Ang pamahayag sa Presidente dungan sa pagsaulog sa ika-127 nga Independence Day kung asa ang kagawasan nga natagamtaman karon sa mga Pilipino tungod sa mga sakripisyo sa mga bayani.
Tungod niini, sumala pa ni Presidente Marcos Jr., angayan lang nga ipadayon ang pakigbisog alang niini nga kagawasan, bisan taliwala sa mga hagit nga giatubang sa Pilipinas sa karon nga panahon.
Matud pa sa presidente nga ubos sa Bag-ong Pilipinas, gawasnon ang pagpadayag og mga opinyon ug pagsaway ug dili na maisip nga sala.
Sa pagkatinuod, mao kini ang nagpatunhay sa demokrasya sa nasud ug nagdan-ag.
Ang problema lang, matod sa presidente, mao ang kaluha nga problema sa kagawasan sa prensa, pagkaylap sa fake news .
Gihatagan og gibug-aton sa presidente nga makapasubo nga adunay mga Pilipino nga nag-insister sa sayop nga pagtuo alang sa interes sa uban, ug dili alang sa kaayohan sa mga Pilipino.
Tungod niini, gitambagan sa presidente ang publiko nga mahimong kritikal, susihon ang kamatuoran, ug pakigbatokan ang mga bakak.
Matod niya nga sama sa gugma, kagawasan ug demokrasya kinahanglang amumahon, bantayan, ug ipaglaban.
