Gitukod ni Presidente Ferdinand Marcos Jr. ang Independent Commission to Investigate Flood Control Anomalies aron sa paghimo sa usa ka hingpit nga imbestigasyon sa mga anomalosong proyekto sa pagpugong sa baha.
Matod sa Presidential Communications Office (PCO), ang independent commission gimanduan sa pag-ila sa mga iregularidad, pagpanubag sa mga nalambigit, ug pagpabalik sa pagsalig sa publiko sa paggasto sa imprastraktura.
Ang PCO midugang nga kini nga lakang usa ka pruweba sa lig-on nga pasalig sa administrasyon sa pagsumpo sa korapsyon, pagpalig-on sa mga institusyon, ug paghatod sa matinud-anon ug epektibo nga serbisyo publiko ubos sa administrasyong Marcos.
Ang Senate Blue Ribbon Committee kaniadto nagpasiugda og moto proprio inquiry sa isyu sa “Philippines Under Water”, aron imbestigahan ang mga ghost project, substandard nga mga proyekto, ug mga kontrata nga may kalabotan sa flood control.
Sa laing bahin, giimbita usab sa House of Representatives ang DPWH ug 15 ka kompanya nga nakakuha og 20% nga flood control projects sukad kaniadtong 2022 alang sa usa ka hearing nga gikatakda sa Septiyembre 2, 2025.
