Gipasalig sa Malacañang nga wala maapektuhan si Presidente Ferdinand Marcos Jr. sa pag-ubos sa iyang trust ug approval rating base sa labing ulahing survey.
Gipasalig usab sa Palasyo nga padayong tumanon ni Presidente Marcos ang iyang katungdanan sa paghatag og desente nga kinabuhi sa katawhang Pilipino.
Sumala kay Palace Press Officer USec Claire Castro, ang nasampit nga survey ang gipatigayon nga may partisipasyon nga 2,400 ka respondents, apan wala kini naga representa sa general sentiment sa tibouk Pilipinas.
Hinuon, matud niya kinahanglan nga masayran ang mga hinungdan nga nakaapekto sa mga panglantaw sa mga respondents, sama sa impormasyon nga ilang nadawat, kung ang mga programa sa gobyerno nakaabot kanila, o kung sila apektado sa fake news.
Sa laing bahin, si Presidente Marcos niingon nga bisan unsa pa ang resulta sa survey, padayon lang sa pagtrabaho, pagbuhat sa husto, ug unsay gimando sa balaod, ug dili ang diktahan sa pipila.
