GENSAN – Malipayon si Mommy Dionisia Pacquiao sa nahimong resulta sa laban sa iyang anak nga si Manny Pacquiao batok sa Mexican fighter nga si Mario Barrios human kini matapos sa tabla.
Matod ni Mommy D nga bisan wala nakab-ot ang kadaogan, mapasalamaton siya nga luwas ug walay grabeng bun-og ang iyang anak.
Sayong buntag pa lang sa Domingo, nagtambong na si Mommy D sa Lagao Gymnasium sa General Santos City aron personal nga masaksihan ang live viewing sa maong engkuwentro.
Makita siyang emosyonal samtang nagtan-aw ug nag-ampo kauban sa ubang mga fans. Sa laing bahin, gipasalamatan ni Mayor Lorelie Pacquiao ang katawhang misuporta sa laban ni Manny.
Gibutyag sa alkalde nga makita gayud ang paningkamot ug disiplina ni Pacquiao sa pagpangandam sa maong duwa, bisan pa man og mas bata ug kusog ang iyang kontra.
Gidugang pa niya nga ang pinakaimportante mao nga luwas ang duha ka boksidor human sa duwa.
Sa tunga sa laban, nasaksihan si Mayor Pacquiao nga emosyonal samtang nagtan-aw ug nag-ampo kauban sa uban nga supporters.
Bisan pa sa tabla nga resulta, gituohan sa daghang fans nga napamatud-an gihapon ni Pacquiao ang iyang kalidad isip boksidor ug inspirasyon sa nasud.
