Andam na ang pambato sa nasod sa Miss Eco International 2025 pageant nga si Alexie Mae Brooks.
Gikatakda kining mopaingon sa Egypt karong adlawa aron makigtigi sa ika-10 ka tuig sa maong pageant.
Ang 24-anyos nga Athlete-beauty queen model ug business administration graduate gikan sa Iloilo maoy lakip sa sendoff media conference sa Miss Universe Philippines organization. Gitambongan kini ni Miss Supranational Philippines 2025 Tarah Valencia.
Si Brooks unang nirepresentar sa nasod isip heptathlete sa 31st Southeast Asian Games sa Hanoi, Vietnam niadtong 2022.
Nainteres siya sa mga pageant ug nahimong Miss Iloilo niadtong 2024 aron makaapil sa Miss Universe Philippines.
Nakasulod siya sa 10 ka finalists ug nakadaog sa titulo nga Miss Philippines -Eco International.
Duha ka babaye gikan sa nasud ang nakadaog sa titulo sa Miss Eco International, si Cynthia Thomalia sa 2018 ug Kathleen Paton sa 2022.
Ang 2025 Miss Eco International final competition ipahigayon sa Al Zahraa sa Egypt karong Abril 20.
