GENERAL SANTOS CITY – Gikonsiderang dakong kalampusan sa kasundaluhan ang pagka-neutralize sa commander sa Guerilla Front 72 nga si Alyas Lope Gamay ug usa ka kauban, human ang natigayong engkwentro sa Purok Pomelo, Barangay Malasila, Makilala, Cotabato.
Matud ni Lt. Silver Belvis, tigpamaba sa 39th IB Philippine Army, sa eksklusibong pakighinabi sa Bombo Radyo, dakong tabang ug gipasalamatan nila ang komunidad sa lugar nga maoy nagpadangat ug report kanila.
Sumala pa nga tungod sa nahigsutang accomplishment, daghang mga kinabuhi ang naluwas gumikan malikayan ang mga kagubot ug pagpabusikad nga himuon sa nahisgutang rebeldeng grupo.
Kini hilabi na nga kung asa gawas sa mga napatay nga rebelde, narekober usab ang 16 ka kilo anti-vehicle IED nga may detonating switch, .45 caliber pistol ug backpack.
Gumikan niini, gatuo si Lt. Belvis nga napiangan na karon ang nasampit nga rebeldeng grupo, hilabi na nga gawas sa duruha, gituuhan nga may mga nasamdan usab sa ilang mga kaubanan.
