GENSAN– Morag eksena sa usa ka action movie ang anti-illegal drug bust operation nga gihimo sa hiniusang pwersa sa Police Regional Office 12 ug South Cotabato Provincial Police Office sa Polomolok, South Cotabato niadtong Lunes sa hapon, Hulyo 14, 2025.
Target sa entrapment operation ang suspek nga si John Louise Delfin Ampo, 28 anyos ug residente sa General Santos City.
Sakay sa puti nga SUV, ang suspek nisuway sa pag-ikyas human makabantay sa mga operatiba.
Kalit niyang gipa-paspas og dagan ang sakyanan nga nitipas sa karsada ug hapit makadisgrasya sa mga pulis ug mga motorista nga niagi sa highway sa Barangay Cannery Site. Bisan pa sa iyang pagsulay sa pag-ikyas, dali nga naabtan sa mga operatiba si Ampo.
Nakuha gikan kaniya ang gidudahang shabu nga gibanabanang mobalor og ₱267,540.
Kasamtangang balhog sa Polomolok Municipal Police Station ang suspek ug nag-atubang sa kasong kalapasan sa Republic Act 9165 o Comprehensive Dangerous Drugs Act of 2002.
