Pag-inom sa kadalanan, hugot na nga gidili

Gipahibalo ni Department of the Interior and Local Government (DILG) Secretary Juanito Victor ‘Jonvic’ Remulla nga ang pag-inom sa kadalanan o daplin sa dalan hugot na nga gidili.

Matod niya nga kini ang pangunang hinungdan sa mga away sa kadalanan o bisan sa sekswal nga pagpanghasi sa mga babaye.

Gimandoan sa kalihim ang pulisya ug bisan ang mga awtoridad sa lokal nga gobyerno nga dakpon ang bisan kinsa nga molapas niini nga palisiya isip kabahin sa Anti-Public Intoxication Act.

Samtang, si Remulla miingon nga wala siyay problema kung ang pag-inom mahitabo sulod sa mga balay ug dili lang sa mga pampublikong lugar sama sa mga kadalanan ug mga eskinita.