GENERAL SANTOS CITY – Giangkon ni Pinoy legend Sen. Manny Pacquiao nga pagkahuman na sa showdown nila ni kanhi four-division world champion Adrien Broner posibleng i-discuss ang tsansa nga matigayonang subling engkwentro nila sa ring ni American undefeated champion Floyd Mayweather Jr.
Sa eksklusibong pakighinabi sa Bombo Radyo GenSan, gibutyag sa Pinoy ring icon nga nadunggan niya gikan kang Floyd nga may engkwentro ang nasampit sa Disyembre 2018 og siya may gikatakdang engkwentro kang Broner hinungdan nga lisod nga hisgutan karon kung may matigayon nga rematch tali kanila ni Mayweather.
Matud pa ni Sen. Pacquiao, may panagkita pa nga ipahigayon tali sa kampo sa American undefeated champion aron maklaruhan kung madayon ang ilang away.
Hinuon, kung adunay negosasyon nga mahitabo target nga ipahigayon ang subling panagsangka nila ni Floyd sa Mayo o Hulyo, 2019.
Mismo ang Senador ang nagkumpirma sa Bombo nga sa Enero 19, 2019 ang pinal nga petsa sa engkwentro nila ni Broner.
Samtang, gihingusgan ni Sen. Pacquiao nga dili lang alang kaniya kun dili mag-abli usab og pultahan alang sa mga Filipino boxers ang pagpirma niya og kasabotan ilawom sa manager sa television series nga Premier Boxing Champions (PBC) nga si Al Haymon.
Matud pa ni Pacquiao, dakong butang nga makaangkon og international fights ang mga boksingero gikan sa nasud hilabina sa Amerika.
Sa iyang pahayag, sa gipirmahan nga kasabotan depende kaniya kung pila ka engkwentro ang ipahigayon.
Gikaingong mas dako na matud pa ang tsansa nga matigayon ang Pacquiao- Mayweather rematch human sa pagpirma sa Pinoy ring icon sa maong kasabotan.
Sa usa ka pahayag, gibutyag ni Pacquiao nga humanon matud pa niya ang iyang nindot nga boxing career sa pakigsangka niini sa mga gikonsiderang top PBC fighters.
Gawas kang Mayweather, gigunitan usab ni Haymon ang mga welterweight champions nga silang Errol Spence Jr. (IBF), Keith Thurman (WBA) og Shawn Porter (WBC).
