GENSAN– Gibutyag ni Senior Fire Officer 2 Filamer Acub, Community Relations Chief sa Bureau of Fire Protection (BFP) General Santos, nga kinahanglan himoon nga ‘lesson learned’ sa publiko ang kanunay nga pag-obserba sa kaluwasan sa balay ug mga establisyemento aron malikayan ang sunog.
Kini nga pahayag human ang dakong sunog sa Cagampang Street kanto Casquejo Street Brgy Dadiangas South ning dakbayan kaniadtong Sabado kung asa namatay ang mag-asawang Sapal og mukabat sa P4.5 million ang damyos.
Iyang gi-awhag ang katawhan ilabi na kadtong nagagamit og mga ‘improvised de bomba’ nga lutuanan nga pirmi i-check ang materyales niini.
Kon dugay na kaayo ug peligroso gamiton, mas maayo nga undangon na ang paggamit niini ug ilisan og bag-o aron makasiguro nga luwas kining gamiton.
Gipasabot usab ni Acub nga mas angay gamiton ang LPG tanks kay kini adunay kalidad ug kasiguraduhan, ilabi na nga adunay regulator nga makapamenos sa peligro sa aksidente.
