Gipresentar sa House prosecution panel atubangan sa Senate Impeachment Court ang testimonya ni AMLC Executive Director Ronel Buenaventura aron pamatud-an nga kapin P319 milyon gikan sa mga kompanya nga nakabase sa China ang gipadala ngadto sa Cale88 Foods Corporation, diin giingong adunay 47.5 percent nga business interest si Atty. Manases Carpio, bana ni Vice President Sara Duterte.
Matod ni private prosecutor Atty. Mae Divinagracia, tulo sa mga ‘remittance’ ang gi-report sa bangko isip kaduda-dudahang transaksyon tungod sa giingong walay legal o ‘trade obligation’ ug klarong ‘economic purpose’.
Gipahayag usab sa prosecution nga kapin P4.5 bilyon ang misulod ug migawas sa 15 ka korporasyon nga giingong adunay interes sila Duterte ug Carpio gikan 2022 hangtod 2025.
Dugang pa sa prosecution, P4.4 bilyon ang kinatibuk-ang covered ug kaduda-dudahang transaksyon nga direktang nalambigit sa mag-asawa gikan 2007 hangtod 2025.
Matod sa prosecution, gamiton ang mga rekord sa AMLC aron pamatud-an ang mga alegasyon ubos sa Article II sa impeachment case batok kang Duterte.
