Nakumpiska sa mga otoridad ang P136 milyones nga kantidad sa carrots, yellow onions ug mga produkto sa tabako sa Port of Subic nga iligal nga gipayuhot sa nasud .
Nasakmit sa Department of Agriculture (BOC) ug Bureau of Customs (BOC) ang lima ka container van nga adunay sulod nga presko nga carrots ug yellow nga sibuyas nga mobalor og P21 milyones, ug laing duha ka container van nga dunay sulod nga sigarilyo.
Nagkantidad kini og P115 milyones.
Ang lima ka sudlanan sa presko nga carrots ug yellow nga sibuyas gi-import gikan sa China sa Betron Consumer Goods Trading, nga orihinal nga gideklarar nga frozen fish egg balls.
Sa laing bahin, ang duha ka container sa tobacco products gikan sa Taiwan ug gi-import sa Subic All N1 Corp., nga dunay tissue atubangan sa van apan nasuta nga dunay sulod usab nga sigarilyo.
Matod ni Bureau of Plant Industry director Gerald Glenn Panganiban, ang mga nakumpiska nga mga utan susihon una ug mahibaw-an kon luwas ba kini sa pagkaon sa tawo.
Ang mga imported nga produkto sa agrikultura nga mapakyas sa mga pagsulay pagalaglagon ug dili ipakaon sa mga tawo.
Ang mga lab-as nga utan ug uban pang mga produkto sa agrikultura nga gi-import sa nasud kinahanglan nga makakuha og sanitary ug phytosanitary import clearance aron mapanalipdan ang kahimsog sa mga tawo, tanum, ug bisan mga hayop.
Gipugngan usab niini ang pagsulod sa mga sakit nga madala niini.
