Sa pagdali-dali pagtubag sa pagkuwestiyon sa Commission on Audit (COA) sa paggasto sa P23.8 milyones nga kantidad sa confidential fund sa Office of the Vice President (OVP), nasulti ang kuwestiyonable ug kadudahan nga resibo nga gisumite aron tarungon ang gihimo nga mahimong sobra nga paggasto.
Ang OVP misumite og 158 AR aron hatagag rason ang paggasto sa confidential fund.
Ang representante sa COA nga si Gloria Camora niangkon sa hearing nga adunay “inadvertence and typographical mistakes” nga nahimo ang mga personnel sa OVP base sa gisumiter nga proof of expenditure niini.
Gihisgotan usab ni Gutierrez ang usa ka AR nga pinetsahan og Nobyembre 2022 nga ang P125 milyones nga confidential fund gi-release niadtong Disyembre 2022.
Ang maong pondo gigasto sulod lang sa 11 ka adlaw niadtong Disyembre 2022. Namatikdan usab ang pagkaparehas sa penmanship ug kolor sa bolpen nga gigamit sa pagsuwat sa AR ingon man ang pagkaparehas sa pipila ka mga mipirma sama nila ni “AAS” ug “JOV” nga nakakuha og kinatibuk-ang P280,000 ug P920, 000 isip bayad sa napalit nga impormasyon sa OVP niadtong Disyembre 2022.
Gipangutana usab ni House Quad Comm senior Vice Chairman Romeo Acop sa ikaduhang distrito sa Antipolo City si Camora, kinsa maoy hepe sa intelligence and confidential funds audit office (ICFAO) sa COA, kon nakabantay ba siya sa pangalan nga Mary Grace Piattos sa usa sa mga AR. Matud pa ni Acop nga Mary Grace ang ngalan sa usa ka restaurant ug “Piattos” ang ngalan sa usa ka brand sa potato chips.
