GENERAL SANTOS CITY – Naghatag ug pagpaklaro ang Diagan Hospital pinaagi kay Dr. Renato Diagan kalabutan sa namatay ang bag-ong himugso nga batang babaye, nga gituuhang gumikan sa gihimong pamaagi sa pagpaanak sa ilang ospital.
Giila ang mireklamo nga inahan nga si Janice Igbos, 29-anyos, taga-Malungon, Sarangani Sarangani.
Sa pakighinabi sa Bombo Radyo, gibutyag ni Dr. Diagan, ‘fully dilated’ na inahan dihang nahidangat sa ilang ospital.
Nigamit ug vacuum aron suporta nga mapagawas ang bata human nga nadugayan ang pagpaanak sa inahan tungod naglisod sa pag-utong.
Gibutyag ni Dr. Diagan nga dili na mahimong i-ceasarian ang inahan tungod kay nigawas na ang ulo sa bata.
Tuod man, malampusong napagawas ang bata gikan sa inahan apan nakabsan sa kinabuhi paglabay sa unom ka oras.
Nangayo og pasaylo si Dr. Diagan sa nahitabo luyo nga gihimo nila ang tanan aron mahimong normal ang pagpanganak sa inahan.
Apan kung mahimo pa unta nga mabalik ang tanan, mas maayo pang agi-ceasarian na lamang ang nasampit.
Kabahin sa alegasyon sa inahan nga hilabihan ka-humok ang ulo sa iyang anak, gibutyag ni Dr. Diagan nga normal lang kini human nga migamit og vaccum.
Kahibaluan nga gimahay sa pamilya ang nagpaanak ug mga staff sa naasoy’ng ospital nganong wala na lang gi-caesarian ang inahan, aron unta mabuhi ang bata.
Apan sila matud pa ang gimahay sa taga-ospital nga wala matud pa misulti nga ipa-caesarian nalang.
Ang gikasakit pa sa buot sa pamilya gumikan human nangayo ug pasaylo, igo lang matud pa misulti ang taga-ospital nga i-libre na lang sa sunod higayon nga subling manganak.
