GENSAN – Human hingpit nga matapos ang franchising sa mga tricycle sa Dakbayan sa General Santos, magsugod na ang implementasyon sa tricycle clustering, sumala sa Public Safety Office (PSO).
Matud ni Atty. Jong Gonsalez, hepe sa PSO Gensan, ang clustering magpasabot nga ang matag tricycle driver mopadayon sa biyahe sulod lang sa gi-assign nga cluster, ug dili na pwede musakay o mobiyahe gawas sa ilang designated area. Kini nga pamaagi nagtinguha sa pag-organisa sa trapiko ug pagpamenos sa kasamok sa kadalanan.
Gipasabot ni Atty. Gonsalez nga ang clustering gipatuman pa sukad tuig 2018, apan karon lamang kini mas lig-on nga ipatuman human makompleto ang franchising sa tanang tricycle units sa siyudad. Ang PSO naglaum nga pinaagi sa clustering, mabawasan ang trapiko ug mas hapsay ang dalan para sa tanan, samtang mas klaro usab ang responsibilidad sa mga tricycle driver.
Gidasig sa PSO ang tanang drayber nga sunod sa cluster system ug sa mga regulasyon sa siyudad aron malikayan ang multa ug suspensyon sa operasyon. Ang mga commuters ug katawhan sa Gensan gilauman nga makabenepisyo sa mas organisado, hapsay, ug seguradong biyahe.
