ALABEL, SARANGANI – Gikumpirma ni Kapitan Herculano Lacaba Sr. sa Brgy Poblacion, Alabel, nga mingaw na ang opisina sa KAPA sa ilang lugar.
Sa pakighinabi sa Bombo Radyo, gibutyag ni Kapitan Lacaba nga kaniadto, una pa gibulabog sa Bombo ang pagka-scam sa KAPA, huot ug daghan kaayo ang mga tawo ug sakyanan nga naglinya sa buhatan nga halos tulo ka lane ang gilukop.
Apan ning higayuna, human gidala sa sibyahanan ang isyu ug gibulgar ang mga anomalya nga ginahimo ni Joel Apolinario, founder sa KAPA, anam-anam na matud pang nangawala ang mga sakyanan nga gatapok ug galinya.
Kini hilabi na matud pa human ang natigayong alleged entrapment sa NBI kanilang Bombo Janjan Macailing ug Bombo Boi Galano.
Base sa iyang nakalap nga impormasyon, daghan na matud pa ang nang-withdraw hilabi na kadtong mga propesyunal ug desakyanan.
Sa iyang nasayran nga minilyon na matud pa ang gipangwithdraw sa mga dinagko nga miyembro, samtang anaa na lamang sa 20% sa mga tawo ang nagpabiling galinya sa opisina sa KAPA, kung asa kasagaran mga mag-uuma, panday, sikad driver, ug uban pa.
Dungan niini, giangkon ni Kapitan Lacaba nga bisan siya ang duda ug gibutyag nga lisod gayud katuuhan ang ginapasiatab nga 30% nga interes sa ginakolekta nga investment pinaagi sa donasyon.
