Mipakita og baruganan ang Office of the Ombudsman nga nakabase sa ebidensya ang kaso nga plunder nga gisang-at batok kang Senador Rodante Marcoleta.
Matod pa sa Ombudsman nga ang senador mismo ang miangkon nga nakadawat siya og cash donations nga nagkantidad og ₱75 milyon.
Sumala sa Tanodbayan, wala usab kini gi-deklara sa senador sa iyang Statement of Assets, Liabilities and Net Worth (SALN) ug Statement of Contributions and Expenditures (SOCE).
Gisusi sa Ombudsman ang pahayag ni Marcoleta bahin sa “utang na loob” ug giingon nga dili kini angay mahimong bug-at o basehan sa usa ka opisyal sa gobyerno sama sa senador.
Dugang pa sa Tanodbayan nga ang usa ka public servant dili angay adunay “personal debt” sa bisan kinsang donor nga mahimong labaw pa sa iyang obligasyon sa katawhan nga iyang gialagaran.
Sumala pa niini, kung ang “utang na loob” gamiton aron tabunan ang ₱75 milyon nga wala nadeklara nga pondo, dili na kini mahimong “utang na loob” kundili usa na ka krimen. Mao kini ang rason, matod pa sa Ombudsman, nganong naangay ang mga balaod sa plunder ug bribery sa Pilipinas.
Giila usab sa Tanodbayan nga ang kaso nahimong sentro sa taas nga diskurso ug girespeto niini ang katungod sa matag usa sa pagpahayag sa ilang opinyon ug sa pagsalmot sa malinawon nga panagtapok.
Apan gipangayo niini nga pasagdan ang balaod ug ebidensya ang mahimong basehan sa paghukom sa kaso.
Karon nga adlaw (Hulyo 3), gipadayon sa Ombudsman ang pagsang-at sa kaso bisan pa sa naunang rally nga gihimo sa Iglesia ni Cristo ug uban pang mga supporter ni Marcoleta.
