Human gibutyag ni Liza Soberano ang grabeng trauma nga iyang naagian sa bata pa siya didto sa Amerika, nitingog na ang iyang kanhi manager nga si Ogie Diaz aron depensahan ug suportahan ang aktres.
Dinhi gikompirma ni Ogie nga tinuod gyud ang trauma ni Liza, matud pa niya nasayod siya sa pipila sa naagian ni Liza ug gidayeg niya ang iyang kaisog sa aktres.
Matud pa niya nga dili ganahan si Liza sa mga manyika ug mga tray sa itlog tungod sa dili maayong mga handumanan kini sa iyang pagkabata.
Kahinumdoman nga sa podcast episode sa “Can I Come In?” ni Sarah Bahbah, giasoy ni Liza kung giunsa sila gi-kidnap saiyang igsoun kaniadtong mga bata pa sila, ang pagkaadik sa droga sa iyang inahan, ug ang kabangis sa ilang foster parents lakip na ang pagpakaon sa hugaw sa iro ug pagkandado kaniya sa garahe.
Sumala pa ni Ogie nga nangayo og tabang si Liza sa usa ka psychiatrist sa bata pa siya, isip kabahin sa pagproseso sa iyang trauma.
Nagtuo usab si Diaz nga ang mga kasinatian ni Liza nakatampo sa iyang kahanas sa pag-arte kon emosyonal nga mga eksena ang hisgutan.
Dugang pa, si Ogie nitug-an nga pangandoy ni Liza nga mahimong artista, sukwahi sa mga interview sa aktres kaniadto diin matud pa niya wala gyud siyay tuyo nga mahimong artista.
Sa laing bahin, gikompirma usab ni Liza sa nahisgutang podcast nga dul-an sa tulo ka tuig nga bulag sila sa iyang kanhi ka-loveteam nga si Enrique Gil, kinsa iyang gitawag nga “first love” ug “safety net.”
Kahinumdoman nga si Liza Soberano kanhi alaga ni Ogie kaniadto sa wala pa mobalhin sa Amerika aron pagsulay sa pagsulod sa Hollywood ug pagpirma sa Careless, ang talent agency nga gipangulohan ni James Reid.
