Napalit sa kantidad P31 milyon ang obra ni Dr. Jose Rizal nga eskultura sa iyang hinigugma nga si Josephine Bracken nga gitawag nga “Josephine Sleeping.”
Sa gipahigayon nga subasta sa Leon Gallery’s Kingly Treasures Auction 2024, giingon ang naasoy nga obra ni Rizal ang may pinakataas nga presyo nga napalit sa subasta human gikulit sa mga bayani.
Matud kang Lisa Nakpil sa Leon Gallery, nagsugod sa presyo nga P7M ang hinimo ni Rizal nga nabaligya ug P31,241,600, kauban sa premium sa nakapalit.
Nalampasan niini ang kanhi may pinakataas nga presyo nga “The Filipino” sculpture nga hinimo usab ni Rizal, nga nabaligya ug P17,520,000 sa Leon Gallery kaniadtong 2018.
Makita sa eskultura si Josephine nga naghigda natabunan sa iyang mga kamot ang iyang dughan ug ang katunga sa iyang lawas natabunan ug habol.
Gihimo ni Rizal ang obra samtang naka-exile sa Dapitan nga gituhuang ulahi niya nga obra.
Nailhan ni Rizal si Josephine (Marie Josephine Leopoldine Bracken) dihang miadto sa Dapitan ang adoptive father nga si George Taufer, nga may problema sa mata ug nagpatambal sa bayaning Pilipino.
