Gilauman sa House prosecution panel nga daghan pa og pangutana nga kinahanglang tubagon ni Atty. Michael Poa sa Senate impeachment trial batok kang Vice President Sara Duterte, ilabina may kalabotan sa paggasto sa confidential funds.
Matud ni House prosecution panel adviser ug spokesperson Robert Ace Barbers, dili pa kompleto ang mga pangutana nga gipangutana kang Poa atol sa miaging hearing sa House Committee on Good Government and Public Accountability.
Si Poa, nga kanhi chief of staff ug spokesperson ni Vice President Sara Duterte atol sa iyang pagserbisyo isip Education Secretary, mitubag kaniadto sa imbestigasyon sa House may kalabotan sa P112.5 milyon nga confidential funds sa Department of Education o DepEd nga gigasto sa unang tulo ka quarter sa 2023.
Gihangyo sa House prosecution panel ang Senate Impeachment Court nga ipatawag si Poa isip testigo sa impeachment trial.
Gilauman nga sentro sa iyang testimonya ang iyang papel sa mga tubag sa DepEd sa mga findings sa Commission on Audit o COA may kalabotan sa paggamit sa confidential funds.
Apan tungod kay kabahin na karon si Poa sa defense team ni Duterte, giplano sa prosecution nga mangayo sa Senate Impeachment Court nga ideklarar siyang hostile witness.
Kung aprobahan, mahimong ikatulong hostile prosecution witness si Poa sa mga pagdungog nga may kalabotan sa confidential funds, human kang kanhi OVP Special Disbursing Officer Gina Acosta ug OVP Assistant Secretary ug Assistant Chief of Staff Lemuel Ortonio.
