Nagtuo ang law professor nga si Atty. Jennifer Reyes nga mahimong kritikal sa pag-uswag sa impeachment trial ni VP Sara Duterte ang mga testimonya nila Gina Acosta ug Edward Fajarda, duha sa gipaabot nga ipresentar sa House prosecution panel sa umaabot.
Sila Acosta ug Fajarda parehong kanhing special disbursing officers o SDO; si Fajarda sa Department of Education o DepEd, samtang si Acosta sa Office of the Vice President o OVP.
Matud ni Atty. Reyes, importante ang testimonya nilang duha aron masubay kung asa napadulong ang mga tseke nga gi-encash gikan sa CIF sa duha ka maong opisina.
Matud pa niya, mahimong makapainteres ang pag-atubang nila sa witness stand tungod kay sila matod pa ang mga nag-unang indibidwal nga posibleng nakahibalo sa “trail” sa hangtod P612.5 milyon nga CIF ni VP Sara sa duha ka opisina nga iyang gipangulohan.
Maayo usab, matud ni Reyes, nga bantayan kung adunay ba silang mga ngan nga posibleng hingtungdan o nakadawat sa pondo human kini ma-encash.
Pinaagi sa duha ka kanhing SDO, posibleng masubay ang mga nakadawat sa kuwarta ug kung makaila niini, mahimo silang padad-an pag-usab og subpoena aron moatubang sa Senate impeachment court.
Kinahanglan usab, matud ni Reyes, nga bantayan sa publiko kung “akuon ba nila kung adunay sayop,” paningkamotan nga malimpyohan ang ngalan sa Bise Presidente, o adunay ba’y ubang dagkong personalidad nga mahimong malambigit sa maong isyu.
