Nagpadayag ang mga senador sa ilang kaandam nga mosuporta sa bag-ong gitudlo nga DPWH Secretary Vince Dizon.
Matod ni Senate President Chiz Escudero, nasayod sila nga dako nga hagit ang atubangon ni Dizon apan kahigayonan usab kini sa pagpatuman sa dugay nang mga reporma sa ahensya.
Matod ni Escudero nga andam ang Senado nga mosuporta sa mga reporma nga iduso ni Dizon aron maseguro nga epektibo, transparent ug may full-accountability ang mga public works.
Bisan si Senador Loren Legarda nipasalig nga andam ang mga senador nga motabang kang Dizon nga makab-ot ang iyang tumong sa transparency ug pagpalambo sa kaayohan sa publiko.
Sa laing bahin, si Senate Majority Leader Joel Villanueva masaligon nga dako ang papel sa Kalihim sa paglimpyo sa ahensya, sama sa iyang gihimo sa Department of Transportation (DOTr) ug pagdisiplina niini.
Matud pa ni Senador Erwin Tulfo nga nakita sa tanan ang gihimo ni Dizon sa DOTr, nga sa matag higayon nga adunay reklamo, dili siya maglangan ug molihok dayon.
Nanghinaot usab ang senador nga mabulgar na sa pamunoan ni Dizon ang kakunsabo sa mga kontraktor, pipila ka opisyal sa DPWH, ug ubang opisyal sa publiko sa mga ghost project.
