GENERAL SANTOS CITY – Nabalaka ug naguol ang mga magtutungha sa Mindanao State University – General Santos City campus kalabutan sa isyu sa gipagawas nga listahan sa Philippine National Police nga nalakip ang tulunghaan sa mga unibersidad sa nasud nga gikaingong naga-recruit aron nga mamahimong myembro sa New People Army kon NPA.
Sumala ni Leonard Tucjayao ang Supreme Student Council (SSC) President sa nasampit na tulughaan, ang MSU-GenSan luwas nga lugar alang sa tanan labi pa sa mga magtutungha ug misunod sa mandao sa balaod nga tumong nga hatagan og proteksyon ang mga kabataan ug mahatagan ug kalidad nga edukasyon.
Dugang pa niini nga makaguba ug reputasyon sa unibersidad ang walay basehan nga alegasyon ug naghatag usab kini og kabalaka sa mga magtutungha lakip na sa mga ginikanan.
Nagpaklaro usab kini nga daghang mga organisasyon ang unibersidad apan alang kini sa kamaayohan sa mga magtutungha ug dili alang sa pagsuporta sa mga rebeldeng grupo nga sukwahi sa gobyerno.
Dugang pa niini nga dili angay i-base ang red-tagging kung aktibo sa mga socio-political issues ang usa ka tulunghaan.
