GENSAN – Gipadayag karon ang kabalaka sa mga backyard hog raisers human matod pa adunay mga dayo nga nagpakatap sa impormasyon nga adunay kaso sa African Swine Fever (ASF) sa ilang lugar aron mapugos sila sa pagbaligya sa ilang mga baboy ug barato.
Kini ang gibutyag ni Dr. Edward Alexander Leyson, nga nagpasabot nga ang maong pamaagi usa ka matang sa pagpangilad nga makadaot dili lamang sa mga magbababoy apan usab sa industriya sa baboy sa rehiyon.
Gipasabot ni Dr. Leyson nga wala’y ikabaraka tungod kay klaro ang resulta sa mga surveillance ug monitoring nga gihimo sa mga ahensya sa agrikultura ug hangtod karon, wala pa’y kumpirmadong kaso sa ASF sa mga backyard raisers nga gilakip sa maong isyu.
Gipahimangnoan usab ang mga mag-uuma nga magpabilin nga alerto ug dili basta-basta motuo sa dili kasaligan nga impormasyon.
Gidasig usab sila sa pagreport dayon sa otoridad kung adunay makitang dayo nga nagpakalat sa maong isyu aron malikayan ang mas dako pang kadaot.
Gipasabot sa mga otoridad nga hugot ang ilang pagbantay ug koordinasyon aron maprotektahan ang industriya sa baboy ug masiguro ang kaluwasan sa publiko batok sa ASF.
