GENERAL SANTOS CITY – Lab-as gihapon sa panumduman sa mga residente ang kahadlok nga nasinatian human sa magnitude 6.5 nga linog nga natigayon sa Eastern Samar, Leyte, Abril 23.
Sa pakighinabi sa Bombo Radyo GenSan, gisaysay ni Mateo Fabillar residente sa Motiong, Samar nga tungod sa kakusog sa pagtay-og nabuak ang semento nga gitongtongan sa tangke sa tubig sa ilang balay.
Sumala pa, paspas silang nanagan pagawas sa ilang balay dihang natigayon ang linog og ang pag-umangkon ang nakuyapan tungod sa sobrang kahadlok.
Dugang pa niini, natumba ang ilang mga aparador og flat screen tv ingon man sa uban pang silingan.
Samtang, bisan sa Julian, Eastern Samar ang sentro sa naasoy’ng linog apan sumala kang Ike Cabangunay nga nabatyagan gihapon sa ilaha sa Guiuan ang makusog nga pagtay-og.
Giangkon nga niadtong natigayon ang linog nabalaka sila sa posibleng pagtaas sa tubig sa dagat bisan pa 200 metros ang gilay-on sa ilang balay gikan sa dagat.
Sumala kang Marcy Dacutanan nga taga Calbayog, Samar nga nabuak ang mga salamin sa usa ka mall og fast food chain sa ilang lugar human sa magnitude 6.5 quake.
Grabeng kahadlok ang nabatyagan niini og sa mga kauban sa gitrabahuan nga appliance center kung asa usa ka 24 inches flat screen tv ang natumba sa gibutangang estante.
Kahibaluan nga daghang lugar sa Eastern Samar ang nawad-an og koryente human sa natigayong makusog nga linog.
Sa karon padayon pang gisuta sa PDRRMO-Eastern Samar ang damyos nga gibilin sa linog sa maong.
