GENSAN – Gipadayag sa Manila Electric Company (Meralco), ang pinakadako nga power distribution company sa Pilipinas, ang ilang tinguha nga motabang sa mga electric cooperatives sama sa SOCOTECO 2, nga kanunay nakasinati og brownout ug power fluctuations sa ilang mga linya.
Sumala sa Meralco, ila nang gihisgutan ang posibilidad nga mutabang pinaagi sa pagpaambit sa kapital ug teknolohiya aron ma-upgrade ang mga sistema sa distribusyon sa kuryente sa rehiyon.
Tumong niini nga mapauswag ang kahimtang sa power supply ug malikayan ang padayon nga pagkaputol sa suplay sa kuryente nga nakapektar sa daghang konsumidor sa South Cotabato, Sarangani ug General Santos City.
Gipasabot ni Atty. Arnel Paciano D. Casanova, representante sa Meralco, nga ang interes sa kompanya dili tungod sa negosyo lamang, apan usa ka pamaagi aron makatabang sa kalambuan sa rehiyon pinaagi sa paghatag og mas lig-on ug mas kasaligan nga serbisyo sa kuryente.
Dugang pa niya, dako ang potensyal sa rehiyon sa aspeto sa industriyal ug komersyal nga kalamboan, apan kinahanglan nga masiguro ang kasaligan nga suplay sa kuryente aron masuportahan kini nga pag-uswag.
Sa pagkakaron, padayon pa ang koordinasyon tali sa Meralco ug SOCOTECO 2 aron masuta ang pamaagi sa teknikal ug pinansyal nga kolaborasyon nga makapahimutang sa dugayng solusyon batok sa mga brownout ug power interruptions sa rehiyon.
