Naghimo og protesta ang mga medical practitioners ug mga babaye sa New Delhi, India karong Sabado.
Kini nunot sa pagpatay nga nahimo human sa paglugos sa usa ka 31 anyos nga trainee nga doktor.
Ang babayeng doktor napalgang duguon ug wala nay kinabuhi sa state-run R.G. Kar Medical College ug Hospital sa West Bengal State sa India.
Base sa autopsy nga gihimo, positibo nga gilugos ug brutal nga gipatay ang biktima.
Samtang, ang protesta gipanguluhan sa Indian Medical Association (IMA).
Nanawagan ang asosasyon sa Punong Ministro sa India nga si Narendra Modi nga hatagan hustisya ang namatay nga doktor ug masiguro ang kaluwasan sa mga medikal nga practitioner.
Base sa pahayag sa IPM, wala nagakaigo nga pahuwayan ang mga doktor sa nasambit nga ospital, gani tion na nga tutokan ang nasambit nga isyu.
Gipahigayon dayon sa mga doktor ang 24 oras nga shutdown sa tanang ospital aron moapil sa ilang protesta.
Ang gidaghanon sa mga kaso sa pagpanglugos ug sekswal nga pag-atake sa India nagpadayon sa pagdaghan, nga hinungdan sa daghang mga babaye sa nasud nga nangayo ug hustisya.
